Subscribe For Free Updates!

We'll not spam mate! We promise.


Monday, July 6, 2009

Pamana ng Trapo'y Republikang Basahan

Nais ko pong ibahagi sa inyo ang isang tula na nagmula sa isang kaibigan sa Multiply. Ito po ay ang tulang "Pamana ng Trapo'y Republikang Basahan". Isinulat po ito ni Gregorio V. Bituin Jr. Sang-ayon ba kayo o hindi?

PAMANA NG TRAPO'Y REPUBLIKANG BASAHAN
ni Gregorio V. Bituin Jr.
14 pantig


Ang bansa nating ito'y tinulad sa basahan
Ng mga trapong ganid na sa kapangyarihan
Sa kanila ang saya, sa masa'y kahirapan
Trapo'y palaging bundat habang gutom ang bayan.

Maging sa pulitika o kaya'y ekonomya
Sila'y naririyan na, pawang pami-pamilya
Relyebo ng mag-anak ang laging nakikita
Kahit sa Malakanyang ay naroroon sila.

Ekonomya, Kongreso't Senado'y kontrolado
Ng mayamang iilan, pati na pulitiko
Republikang basahan ang pamana ng trapo
Halina't ating tingnan ang kanilang epekto.

Pinatakaran nila'y itong globalisasyon
Na sadyang nagpahamak sa manggagawa't unyon
Serbisyo'y ninegosyo nitong pribatisasyon
Merkado ang bahala dahil deregulasyon.

Kalikasa'y sinira, yumaman ang banyaga
Pagkat pinagminahan ang ating mga lupa
Puno'y pinagpuputol kaya lagi ang baha
Pati kapaligiran ay binabalahura.

Ang dukha'y tinanggalan ng kanilang tirahan
Ang manggagawa nama'y biktima ng tanggalan
Magsasaka'y nawalan ng lupang sasakahan
Nag-ari'y ang kumpanya't kinapital ang bayan.

Katutubong kultura'y pilit ding tinatanggal
Pati ang katutubo'y aalisan ng dangal
Nais pang palayasin ng mga trapong hangal
Upang lupang ninuno'y makuha ng kapital.

Ang babae'y produkto sa mga palatastas
Sila'y pinagigiling sa maraming palabas
Alak, babae, sugal ang pinausong batas
Ganito ang sistema sa bayang dinarahas.

Karapata'y binili, edukasyon ay mahal
At mahal na rin kahit ang pagpapaospital
Ang lahat na'y may presyo at ginawang kapital
Tatawanan ka nila pag ikaw ay umangal.

Pulitikang binaboy, pulitikong gahaman
Ekonomyang winaldas, kapitalistang ilan
Wasak na kalikasan, kahirapan ng bayan
Na ang naging resulta'y republikang basahan.

Paghahari ng trapo'y dapat nating wakasan
At huwag ipanalo sa sunod na halalan
Ilibing sa pahina ng ating kasaysayan
Yaong pamilyang trapong walang silbi sa bayan.

Maralita, obrero, babae, magsasaka
Lahat ng aping sektor, halina't magkaisa
Republikang basahan ay ating palitan na
Ng gobyerno ng masa't matinong republika.




Also Visit My Other Blogs
| Newz Around Us | Ordinary People, Ordinary Day |

Pagod Ka Na Bang Maging si Juan?
SOCIALIZE IT →
FOLLOW US →
SHARE IT →

1 comments:

onin said...

 hindi yan ang hinahanap ko bakit yan ang lumalabas?!!!!!!!!!!!!!